De joekskepel Loester Good is in 1991 opgerich door un aantal lede van sjötteriej St Urbanus oet Mofert. Un aantal klaroenblaozers vanne sjötteriej wol inne wintjer waal uns get angere meziek make es in ut zomersezoen. Mer allein mit de lede vanne sjötteriej die mit wolle doon waas de groep te klein om un kepel te kinne beginne. D’r waerde kontak gezoch mit de lede van ut trommelkorps Excelsior oet Mofert wovan ouch waal ein paar lede mit wolle doon.
Hiemit haaje veer de biezonjer situatie det d’r un kepel waerde opgerich wobiej eedere blaozer nag mos lieëre un gesjik instrument te speele. Ieërs waerde de bezètting vasgestèldj en daonao höbbe veer allemaol un instrument gekoch.
Onger leiding van unne echte dirigent en komponis Piet Wolters höbbe veer de ieërste noeate lieëre blaoze.
In de jaore daonao höbbe veer geine intructeur mieër kinne vinje dae tied houw om de kepel te begeleije en höbbe veer os alles zonger instrukteur gelieërd.